سکر: بلاول ڀٽو جي هدايت تي ٻوڏ متاثرين ۾ گهرن جا سرٽيفڪيٽ ورهايا، فرخ شاهه جو دورو ۽ خطاب

سکر (رپورٽ: امداد گل ڪلوڙ) پاڪستان پيپلز پارٽي جي چيئرمين بلاول ڀٽو زرداري جي خاص هدايتن تي سنڌ اسيمبلي جي ميمبر سيد فرخ شاهه ڊپٽي ڪمشنر سکر ڊاڪٽر راجا ايم بي ڌاريجو ۽ ٻين آفيسرن سان گڏ يوسي  نصيرآباد جو دورو ڪيو ته جيئن سنڌ پيپلز هائوسنگ تحت ٻوڏ ۽ برسات متاثرين ۾ گهر جي ملڪيت جا سرٽيفڪيٽ ورهايا وڃن.

تقريب ۾ شرڪت ڪندي هن 150 کان وڌيڪ برسات ۽ ٻوڏ متاثرين کي گهر جي ملڪيت جا سرٽيفڪيٽ ڏنا. بعد ۾ ميڊيا سان ڳالهائيندي سنڌ اسيمبلي جي ميمبر سيد فرخ شاهه چيو ته هي دورو چيئرمين بلاول ڀٽو زرداري جي هدايتن تي سنڌ پيپلز هائوسنگ تحت ٺهيل ٻوڏ متاثرين جي گهرن جو دورو ڪرڻ ۽ انهن کي انهن جي گهرن جي ملڪيت جا حق ڏيڻ لاءِ هو. هن برسات ۽ ٻوڏ متاثرين کي گهر تحفي ۾ ڏنا آهن.

هن وڌيڪ چيو ته عورتن کي ملڪيت جا حق ڏنا ويا آهن ته جيئن انهن جي پوري نسل ترقي ڪري سگهي. برسات ۽ ٻوڏ متاثرين لاءِ گهر ٺاهڻ هڪ انقلابي قدم آهي جيڪو امير ۽ غريب جي وچ ۾ فرق کي ختم ڪندو ۽ ان سان ملڪ جي معيشت ۾ به بهتري ايندي.

جُولاءِ 13, 2025