”جنهن کي چارو وجهي رهيا آهيو، اهو کائيندو به ۽ اٽون به هڻندو“ ٽرمپ لاءِ نوبيل انعام جي درخواست تي سعد رفيق جو ردعمل

اسلام آباد (ويب ڊيسڪ) حڪومت طرفان آمريڪي صدر ڊونلڊ ٽرمپ کي نوبيل امن انعام 2026 لاءِ نامزد ڪرڻ جي سفارش تي ردعمل ڏيندي مسلم ليگ (ن) جي سينيئر اڳواڻ ۽ اڳوڻي وفاقي وزير خواجا سعد رفيق سخت تنقيد ڪئي آهي.
سماجي رابطن جي ويب سائيٽ ايڪس تي پنهنجي پيغام ۾ سعد رفيق چيو ته ”جنهن کي چارو وجهي رهيا آھيو، اھو کائيندو به ۽ اٽون به هڻندو.“
هن ايران خلاف اسرائيلي جارحيت تي تنقيد ڪندي چيو ته” صهيونيت هڪ شيطاني لشڪر آهي ۽ ان جو هر سهولتڪار ۽ مددگار انسانيت، امن ۽ انصاف جو دشمن آهي.“
سعد رفيق لکيو ته ” غزا ۽ ايران تي جنگ مڙهڻ وارا ۽ سندس سرپرستي ڪندڙ رڳو مذمت ۽ مزاحمت جا حقدار آهن.“
هن چيو ته، “اسرائيل مسلم دنيا جي دِل کُپي ويل خنجر آهي، جيڪو آمريڪا جي هنج ۾ ويهي، بار بار اسان کي زخمي ڪري رهيو آهي.“