روايتي سياست ختم ٿي چڪي، ملڪ ۾ هاڻ انقلاب جي ضرورت آهي: فضل الرحمان

اسلام آباد(ويب ديسڪ ) جي يو آءِ سربراهه مولانا فضل الرحمان چيو آهي ته روايتي سياست جو دور هاڻ ختم ٿي چڪو آهي، ملڪ ۾ هاڻ انقلاب جي ضرورت آهي، عوام کي بيدار ڪريو ۽ انهن ۾ شعور پيدا ڪريو ته جيئن اهي پنهنجن مسئلن لاءِ آواز بلند ڪري سگهن،

پاڪستان کي کليل طرح ايران جي حمايت ڪرڻ گهرجي، قومي اسيمبلي ۾ خطاب ڪندي هن چيو ته گڏيل قومون انهن طاقتن جي لونڊي آهي، جيڪڏهن ايران اسرائيل کي جواب ڏئي رهيو آهي ته ان جا هٿ روڪيا وڃن ٿا، جڏهن ته ٻئي پاسي انهن کي مڪمل آزادي ڏني وئي آهي،

اسان کي پنهنجي پاليسين تي سنجيدگي سان غور ڪرڻو پوندو  ڇو ته فلسطين، لبنان، شام، عراق، ايران ۽ پاڪستان کي تباهه ڪرڻ انهن جي ايجنڊا آهي، عالمي ادارن جي هاڻي ڪا به حيثيت نه رهي آهي، او آءِ سي رڳو ڏيکاءُ لاءِ رهجي وئي آهي، هن چيو ته ملڪ جون اندورني ۽ بيروني حالتون حڪومت جي ڌيان جي تقاضا ڪن ٿيون،

نائن اليون کان پوءِ ملڪ لڳاتار بد امني جو شڪار رهيو آهي، جيڪا بدقسمتي سان هاڻي معاشري جو حصو بڻجي وئي آهي، اڄ ڪو به ماڻهو خيبر پختونخوا يا بلوچستان ۾ ڀتو ڏيڻ کان سواءِ نٿو رهي سگهي، اسان هڪ ڀيرو ٻيهر بارود ۽ ميزائلن جي نشاني تي آهيون، اسان تمام گهڻو رت ڏئي ڇڏيو آهي، اسان جي قوم وڏيون قربانيون ڏنيون آهن ۽ اسان جي فوج به وڏيون قربانيون ڏنيون آهن، هن چيو ته هر حڪومت پنهنجي پيش ڪيل بجيٽ کي بهتر قرار ڏيندي آهي، جڏهن ته عام ماڻهن جي راءِ بجيٽ بابت سٺي نه آهي،

هتي معيشت جي منفي واڌ به ڏسڻ ۾ آئي آهي، ملڪ جي معاشي ترقي لاءِ پرامن ماحول جي سخت ضرورت آهي، مولانا فضل الرحمان وڌيڪ چيو الله ڪري ته اسين پنهنجي روش تي نظرثاني ڪريون، ملڪ اندر جمهوري طرز عمل کي بحال ڪريون، سياستدانن سان انتقامي رويو نه رکون ۽ ملڪ ۾ هڪ اهڙو نظام قائم هجي جيڪو انصاف تي ٻڌل هجي، معيشت طاقت جي استعمال سان بهتر نه ٿيندي،

معيشت تڏهن بهتر ٿي سگهي ٿي جڏهن قوم کي انصاف مهيا ڪيو وڃي، جڏهن حڪومت کي ڪا ڳالهه پسند نه اچي ته اها اپوزيشن جي آواز کي بند ڪري ڇڏيندي آهي، اسپيڪر کي گهرجي ته ان جو نوٽيس وٺي ۽ ان تي رولنگ جاري ڪري، مولانا فضل الرحمان جي تقرير دوران ڪيترائي ڀيرا آڊيو بند ڪئي وئي.

جُون 20, 2025