اي سنڌ توسان ڪنهن ڪنهن جي تعزيت ڪريان!!!؟
اعجاز ممنائي
مڃان ٿو ته موت برحق آهي ۽ هر انسان کي موت جو مزو چکڻو آهي بيشڪ دنيا جا رنگ ۽ ميلا عارضي آهن اصل زندگي آخرت جي آهي. هيءَ دنيا فاني آهي ۽ اسان سڀني کي هڪ ڏينهن پنهنجي رب جي آڏو پيش ٿيڻو آهي. جيڪو هتي پوکيندو سو اتي ئي لڻندو.انڪري پنهنجي زندگيءَ کي نيڪ عملن سان سينگاريو ۽ آخرت جي تياري ڪريو، ڇو ته دنيا ۾ هر عيد ختم ٿي ويندي پر عمل هميشه رهندا بقول ڪنهن شاعر جي:
موت برحق ہے یہ ایمان ہے میرا لیکن
تم مجھے مار کے کہتے ہو خدا نے مارا
کوئی مرتا ہے سڑک پر کوئی بیماری سے
ہائے وہ شخص جسے چشمِ خفا نے مارا
ہائے تعلیم فروشی نے مِیرے بچوں کو
میرے ماں باپ کو بھی مہنگی دوا نے مارا
مون سوچيو ته انسان جي دل گھڙيال وانگر ڌڙڪي ٿا جڏهن سندس آواز (ٽڪ ٽڪ) بند ٿي ويندو، ته اهو گهڙيال موت وانگر خاموش ٿي ويندو. پر، ھن گھڙيال جي موت ۽ انسان جي موت ۾ وڏو فرق آھي! انسان جي تخليق گھڙيال جو آواز بند ٿيڻ کان پوءِ چاٻي يا سيل تبديل ٿيڻ سان گهڙيال ۾ ٻيھر زندگي پيدا ڪري سگھجي ٿي، پر انسان جي ٿڌي جسم ۾ ٻيھر ڪير روح ڦوڪي، زندگي پيدا نه ٿو ڪري سگھي۔ واقعي دنيا فاني آهي، هي محل، بنگلا، ماڙيون، بينڪ بيلنس، دوست، رشتيدار، سب هت ڇڏي،انسان اڪيلو قبر ۾ وڃي سمهندو انڪري قبرستان ۾ پوريل انسانن کان عبرت وٺڻ گهرجي انڪري چيو ويو آهي خدا باقي، بندو خاڪي، ٻه ڏينهن اوطاقي، خاڪ ٿي ويندا خاڪ ۾ خاقان توڙي خان.ڪسرا ڪٿي، قيصر ڪٿي، اقبال، اسڪندر ڪٿي،تن جا لکين لشڪر ڪٿي، عالم سڄو آخر فنا ٿيندو پيو وڃي
جو چمن سے گذرے تو، اے صبا تو یہ کہنا بلبل زار سے
کہ خزاں کے دن بہی ہیں سامنے، نہ لگانا دل بہار سے
فيبروري جو مهينو فنانيت جو مهينو پيو لڳي هڪ ئي هفتي ۾ ڪيترن ئي ويجهن ساٿين جو وڇوڙو ٿيو آهي جنهن جيء کي جهوري وڌو آهي انهن محبوب ماڻهن ۾ پيارو عبدالستار کوهارو آهي جيڪو اصل شڪارپور جو رهاڪو هو پر نوشهروفيروز ۾ نوڪريء بهاني رهندي اسانجي ايترو ته ويجهو ٿي ويو جو کانئس پنهنجو شهر ئي وسري ويو ۽ اسان سان رلي ملي ويو هڪ مومن جي حيثيت سان هر روحاني اجتماع ۾ توڙي اسپتال ۾ گڏ هوندا هئاسين ۽ کل خوشيء سان ڀاڪر پائي حال ڀائي ٿيندا هئاسين۔اچانڪ سندس گهران ڪال آئي ته ڊاڪٽر سکر جي اين آئي سي وي ڊي جي وينٽيليٽر تي آهي سندس لاء دعا گهرايو۔مان فوري طور مومنين کي دعا جي التماس ڪئي۔ مولانا محمد ياسين ڪميلي مولا رضا عه جي زيارت لاء ويل هو تنهن مولا جي بارگاهه ۾ دعا گهري جڏهن ته ٻين مومنين پنهنجي دعائن ۾ ڊاڪٽر عبدالستار کوهاري جي صحتيابيء لاء اجتماعي دعائون به گهرايون پر ”لکيو منجهه نراڙ قلم ڪياڙي نه وهي“ جي مصداق امر الاهي مڃڻو پيو ۽ ٻن ڏينهن بعد پيارو ۽ دلي دوست عبدالستار کوهارو اسان کان هميشه لاء وڇڙي ويو۔اڃان ان محبوب دوست جي تعزيت پئي ڪئي سين ته نوشهروفيروز جو رهواسي ۽ هر سڏ ۾ سڏ ڏيندڙ مولانا عبدالحسين مري جي لاڏاڻي جي خبر آئي جيڪو ساهتي پرڳڻي اندر ديني خدمتن ۾ ڏينهن رات مصروف رهندو هو توڙي جو پاڻ مدرسه هائي اسڪول نوشهروفيروز ۾ استاد به هيو پر دين جي پرچار ۾ اڳڀرو رهندو هو پاڻ نوشهروفيروز ۾ مردن توڙي عورتن لاء الڳ الڳ مدرسا قائم ڪيا جڏهن ته سموري پرڳڻي ۾ پنهنجا شاگرد ديني خدمات لاء ڪيترن ئي ڳوٺن ۾ موڪليا سندس اهي ديني خدمتون سدائين ياد رهڻ جهڙيون آهن۔پوليس لائين جي ڀرسان مدرسي اندر مرحوم جي جنازه نماز ۾ شرڪت ڪئي۔ اتي ئي خبر آئي ته مخدوم صدرالدين جو لاڏاڻو ٿي ويو آهي جنهن جي نماز جنازه ڪنڍا کاهي ۾ شام ادا ڪئي ويندي۔ مخدوم صاحب سان ڪافي وقت گڏ گذاريو پاڻ سول اسپتال نوشهروفيروز ۾ اڪائونٽنٽ جي سيٽ تي هوندو هو پر پروموشن ٿيڻ کانپوء ڊي ايڇ او آفيس نوشهروفيروز ۾ پوسٽنگ ڪرايائين۔ جتي پاڻ ڪينسر جهڙي موزي مرض ۾ مبتلا ٿي ويو ۽ اڪثر بيمار رهڻ لڳو نيٺ ڌڻيء جي در پهچي ويو ۽ اسان سندس لاء دعاگو آهيون۔اهڙي غمگين موسم ۾ هڪ ڏينهن بعد پيراميڊيڪل جي بهادر ساٿي شڪارپور واسي اعجاز احمد ڪاڪيپوٽو جي شهادت جي خبر آئي ته نامعلوم ماڻهن هٿان کيس گوليون هڻي شهيد ڪيو ويو۔ پاڻ رٽائرمينٽ تائين سنڌ جي پيراميڊيڪل اسٽاف جي جدوجهد ۾ ڪڏهن به پوئتي نه هٽيو ۽ نون نون اڳواڻن کي همٿائيندو رهيو ته هن بيحس قوم لاء وڙهو ڀلي اهي قدر نه ڪن پر توهان پنهنجي زميواري پوري ڪري انهن کي پنهنجا جائز حق وٺي ڏيو۔ سندس رٽائرمينٽ کان اڳ مون انٽرنيشنل رائٽرز فورم سنڌ جي پليٽ فارم تائين کيس لائيف ٽائيم اچيومينٽ ايوارڊ پڻ ڏنو ڇوته پاڻ سڄي عمر جستجو ۾ گذاريائين پر قوم سندس قدر نه ڪيو آخر برادريء طرفان زمين جي تڪرار تان کيس گوليون هڻي شهادت جو جام پياريو ويو۔
اڃان اهو سور سيني ۾ سمايل رهيو ته سنڌي ادبي سنگت جي سگهاري شخصيت ڊاڪٽر ذوالفقار سيال جي وڇوڙي جي خبر آئي۔ ڊاڪٽر ذولفقار سيال سنڌي ساهت ۽ سنڌي ڪويتا جو وڏو ڀاري نالو ھو پاڻ جيترو نثر ۾ نالو ڪمايائين اوترو ئي نظم ۾ ٻارن لاء لکندو رهيو سندس نثر ۽ نظم ٻئي مقبول لاتعداد ڪتاب لکي سنڌي ادب ۾ پنھنجو نالو ڪمايو۔ مسيحائي پيشو سندس سڃاڻ ته ھئي پر ان سان گڏ ادب ۾ به ڊاڪٽريٽ ٿيل ھئس ان کان علاوه ٻيا کوڙ حوالا سندس شخصيت سان سلهاڙيل هئا۔ پاڻ تمام وڏو نقاد ھوندو هو سندس تنقيد سچ تي مبني ھوندي ھئي ۔کيس ھر موضوع تي دسترس حاصل آھي مذهب سائنس فلسفو ادب شاعري آرٽ تاريخ ۽ تمدن لغت ۽ منطق نفسيات ۽ تصوف وغيره تي سندس گھري نظر رکندڙ هو۔سندس وڇوڙو سنڌي ادب لاء وڏو دکدائڪ آھي۔
اڃا انهن سڄڻن جون سارون پئي ساريم ته مٿان موت جو پروانو ڊاڪٽر پرويز پيرزادو جي خبر کڻي آيو۔ڊاڪٽر پرويز پيرزادو عجيب انوکو ماڻهو هيو. سدائين ٻين جي ڀلائي لاء ڪم ڪندو هو. هن جي ٻارڙن جي تعليم سان گهڻي دل لڳندي هئي. پنهنجي ڳوٺ جي ماڻهن جا فلاحي ڪم خوشي سان ڪندو هو.اڄ پرويز پاڻ هن دنيا جي اکين کان اوجهل ٿي ويو.
ساڳي ريت انتهائي پيارو ۽ دوستن جو دوست, قاسم آباد گورنمينٽ ڊگري آء ٽي ڪاليج جو پرنسپال پروفيسر خورشيد احمد شيخ, جيڪو چند مهينا اڳ رٽائرڊ ٿيو هو, يارن جو يار ڏکئي سکئي وقت ۾ سڀ ڪنهن سان ڀرجهلو, سياسي سماجي اڳواڻ برين ٽيومر سبب اوچتو هن دنيا کي الوداع ڪري هميشه لاء موڪلائي خالق حقيقي سان مليو۔ ان سان اڃا رسمي تعزيت جاري هئي ته سنڌ جي انقلابي، رومانوي ۽ مزاحمتي شاعر ڊاڪٽر آڪاش انصاري جي اڻ مندائتي موت جي خبر اچي ڪڙڪي جنهن کي پنهنجي ويڳي پٽ خنجر جا وار ڪرڻ بعد باهه ڏيئي ساڙي ڇڏيو جنهن تي سڄي سنڌ سوڳوار بڻجي ويئي۔پوسٽ مارٽم ڪندڙ ڊاڪٽر جو چوڻ آهي ته ڊاڪٽر آڪاش انصاري جَي جسم تي ڇرين جا نشان آهن، جيڪي ٻنهي ڦڦڙن تائين وڃي پهتا آهن، ڇُرين جي حملي سبب سندس مڻڪي واري هڏي به ڪپيل آهي، ڳچي ۾ 6، ڇاتي ۾ 4، پيٽ تي 3، پٺي تي هڪ ۽ ڄنگهه تي به هڪ ڇري جو زخم آهي، ڊاڪٽر آڪاش مزاحمت نه ڪئي، جنهن مان لڳي ٿو ته کيس نشو ڏئي ڇرين سان قتل ڪرڻ بعد لاش ساڙيو ويو. اهڙن ڏکوئيندڙ واقعن سان گڏ مانجهند انڊس هاءِ وي سرائي سولنگي اسٽاپ تي ٻن ڪارن جو آمهون سامهون ٽڪر ٿيڻ سبب 5 ڄڻا فوت ۽ 5 زخمي ٿي پيا هن حادثي ۾ شهيد علامه حسن ترابي جو پٽ زين ترابي، مشهور خطيب خواجه علي ڪاظم ۽ سيد علي جان رضوي به فوت ٿي ويا آهن جڏهن ته قلندر جا ڪيترائي زائرين روڊ حادثن ۾ شهادت ماڻي۔ سوچيان ٿو ته آخر مان ڪنهن ڪنهن سان تعزيت ڪريان ۽ ڪنهن کي هن دردوندي ديس جي دانهن ڏيان بس سمورن مرحومين لاء ڌڻيء در دعاگو آهيان ۽ سندن مغفرت جي دعا گهران ٿو۔ رب پاڪ سندن ڪيل خدمتن جو بي حساب اجر عطا فرمائي ۽ کين جنت الفردوس ۾ اعليٰ مقام عطا فرمائي. آمين
اڄ نه اوطاقن ۾ طالب تنوارين
آديسي اُٿي ويا مڙهيون مون مارين
جي جيء کي جيارين سي لاهوتي لڏي ويا۔
اي پيپر
