سنتوش ڪمار جو قتل ۽ هندو برادري

آزاد اي رحمان سپڙو

سنتوش ڪمار کي ٽن نامعلوم انسانيت جي ويرين ۽ دشمنن ٽيون ڏينهن بيدرديءَ سان نم چؤنڪ تي قتل ڪري اسان کان هميشه جي لاءِ ھي فقير صفت انسان جدا ڪري ڇڏيو آهي.

سنتوش ڪمار ھڪ نھايت فقير صفت ۽ عاجزانه طبيعت جو مالڪ انسان ھيو جيڪو ھر ھڪ انسان دوست ماڻھوءَ جي دل ۾ گھر اڏي ويھندڙ دوڪاندار ۽ پورھيت ھيو.هو ھر ايندڙ ويندڙ گراھڪ توڙي عام ماڻھوءَ سان نھايت ادب ، احترام ۽ نياز نوڙت ۽ عاجزيءَ سان پيش ايندو هو. ھن، شھر جي ماڻھن جون دليون کٽي ورتيون ھيون.ھو پنھنجي سٻاجھي طبيعت ۽ اعليٰ اخلاق ۽ زندگيءَ جي مرڪندڙ انداز سان ماڻھن جي دلين ۾ اھڙي ته جاءِ جوڙي چڪو ھئو جو ڄڻ ته ھر ھڪ ماڻھو اھو ٿو سمجھي ته سنتوش ڪمار نه فقط ھندو ڪميونٽي جو فرد ھيو پر ھو ته اسانجو به سنڌي ڀاءُ ھيو.

سنتوش ڪمار کي ظالمن 29 جنوري 2025 جي اڀاڳي شام تي پنھنجي ئي دڪان تي گوليون ھڻي زخمي ڪيو، جنھن کي اسپتال نيو ويو. شھر ۾ ھي خبر باھ جيان ڦھلجي وئي ته سنتوش ڪمار کي انسانيت جي ويرين گوليون ھڻي زخمي ڪيو آھي ، مان به جلد ھڪ دوست سان گڏ سرڪاري اسپتال ڏانھن ويس، اتي پھتس ته اھا نڀاڳي خبر ملي ته سنتوش ڪمار گذاري چڪو آھي.ظالمن ھڪ فقير صفت انسان سنتوش ڪمار کي قتل ڪري ھن شھر واسين کي اھڙو ته جدائي جو گھرو گھاءُ ڏئي ڇڏيو آھي جيڪو، فراق ۾ ڳوڙھن جو سمنڊ وھائي ڇڏڻ سان به ڪڏھن نٿو ڌوپي سگھجي.

ھن شھر جي ھر ھڪ حساس ماڻھوءَ جو من اداس آھي، روح گھايل آھي، اڄ ھي فقير صفت انسان نئون ديرو جي مشھور نم چؤنڪ سميت انھن سمورن ماڻھن کي روئندو ۽ تنھا ڪري ھندو ڪميونٽي سان تعلق رکندي به پاڻ کي مذھبي رسمن کان مٿانهون ۽ آزاد سمجھندي انسانيت جو ناتو اتم ۽ اعليٰ سمجھندي پنھنجي وصيعت مطابق پنھنجي جسم خاڪيءَ کي ساڙڻ بدران پير جان محمد جي مقام تي دفن ڪرائي ۽ اڄ مٽيءَ ماءُ جي هنج ۾ وڃي ستو آھي.

اسين سڀئي شھر واسي پرامن ھندن کي پنهنجي برادري ۽ سنڌ جي سونھن سمجھون ٿا، سنڌ جي مختلف شھرن ۾ ڪڏھن ڪاٿي ته ڪڏھن ڪاٿي ھندو ماڻھن يا ٻين شريف ماڻھن کي ٽارگيٽ ڪري ھن ڌرتيءَ کي بدامنيءَ جي باهه ۾ ساڙي جھنم بڻايو پيو وڃي.اسين ھن ڪربناڪ غم ۾ پنھنجي ھندو ڀائرن کان ڪنھن به ريت جدا ناھيون.ڪاش ھن فقير صفت انسان جو خون ظالمن جي ڳچيءَ ۾ ڦاھي جو ڦندو بڻجي پوي.

ھن مظلوم ۽ فقير صفت انسان جي ناحق خون عيوض ھن شھر سميت سنڌ جو سمورو مظلوم عوام ھر ظالم جي خلاف گڏجي ۽ رڪ جي ديوار بڻجي بيھي ته ھوند ڪنھن به ظالم ۽ قاتل کي ڪڏھن وري جرئت نه ٿئي جو ڪنھن مظلوم جو خون وھائي ۽ ڪنھن جو اڱڻ اجاڙي سگھي.اھو سنتوش ڪمار جي محبت ۽ عاجزاڻي ڪردار جو ماڻھن جي دلين تي عڪس ھيو جو نئون ديرو جي ھن ڪربناڪ واقعي تي مون ڪيترن ئي ماڻھن کي لڙڪ لاڙيندي ۽ زارو قطار روئندي ڏٺو.

جنوري 31, 2025