دادو: فنڪارائن صنم ماروي ۽ مهڪ ماروي جو ڪلچر ڊپارٽمينٽ خلاف احتجاج، بيمار ماءُ جي علاج ۽ سرڪاري تقريبن ۾ ڌيئرن کي موقعا ڏيڻ جو مطالبو،

دادو(رپورٽ: سرور جلال سولنگي) سنڌ جي ناليواريون فنڪارائون ۽ وزيراعليٰ سنڌ سيد مراد علي شاهه جي ڳوٺ واھڙ ۾ جنم وٺندڙ دادو جون رهواسي 2 ڀينر فنڪارائن صنم ماروي ۽ مهڪ ماروي پنهجي ماءُ ريحانہ لاشاري سمعيت ڪلچر ڊپارٽمينٽ جي مبينا ناانصافي ۽ بي ڌياني خلاف دادو پريس ڪلب پهچي لڙڪ هاري ويٺيون انهن ڏکارو ٿي چيو ته سياحت ثقافت کاتي پاران مسلسل 10 سالن کان نذرانداز ڪيو پيو وڃي سندن زندگي جو گذر سفر گلوڪاري تي آهي، غربت باوجود به فن کي وقت ڏئي رهيون آهيون،

پر حڪومتي سطح تي ڪنهن به قسم جو سهڪار نہ ٿو ملي، هنن الزام هنيو ته سياحت ثقافت کاتي جون دعوائون رڳو زباني آهن، عملي طور تي نون اڀرندڙ فنڪارن کي موقعيہ فراهم ڪرڻ ۾ ناڪام ٿي ويو آهي صنم ماروي ۽ مهڪ ماروي نير ھاريندي ٻڌايو ته ڊائريڪٽر ڪلچر ڊپارٽمينٽ حبيب الله ميمڻ وٽ به بار بار عرض کڻي ويون آهيون، پر ڪنهن به سرڪاري تقريب ۾ شامل نه ٿو ڪيو وڃي،

جيتوڻيڪ هو پنهنجي خرچ تي وڏن ميلن شاھ عبداللطيف ڀٽائي، قلندر لال شھباز، سچل سرمست ۽ تقريبن ۾ پهچون ٿيون، پر دروازي تان واپس موٽايو وڃي ٿو،  تازو ئي شاھ عبداللطيف ڀٽائي رح جي عرس ۾ پڻ کين اينٽري نه ڏني وئي فنڪارن ٻڌايو ته سندن رهائش ڪرائي جي گهر ۾ آهي ۽ سندن ماءُ سخت بيمار آهي، جنهن جي علاج لاءِ مالي سهڪار جي سخت ضرورت آهي.

هنن وزير ثقافت ۽ سياحت سيد ذوالفقار علي شاھ، ڊاريڪٽر ڪلچر ڊپارٽمينٽ حبيب الله ميمڻ ،وزير اعلي سنڌ سيد مراد علي شاھ ۽ ٻين وس وارن کي نوٽيس وٺڻ جي اپيل ڪندي چيو ته ٻين فنڪارن جيان سندن به حق آهي ته کين سرڪاري تقريبن ۾ ڳائڻ جو موقعو ڏنو وڃي، جنهن سان هو پنهنجي بيمار ماءُ ريحانہ لاشاري جي ڪفالت سان گڏ گهر جو گذر سفر به هلائي سگهن،

آگسٽ 11, 2025