ڊاڪٽر قادر مگسي جو سڪرنڊ ۾ تعزيت، سنڌ حڪومت تي امن امان خراب ٿيڻ جا الزام
سڪرنڊ ( رپورٽ:راج ڪماراوڏ) سنڌ ترقي پسند پارٽي جي چيئرمين ڊاڪٽر قادر مگسي سڪرنڊ لڳ ڳوٺ حاجي الله بخش مگسي ۾ پهچي مگسي برادري جي معتبر شخصيتن معاز علي مگسي جي والد ، آفتاب علي مگسي ۽ اسد علي مگسي جي چاچي مرحوم رئيس محبوب علي مگسي جي لاڏاڻي تي دعا گهري تعزيت ڪئي ٻئي پاسي هن ايس ٽي پي جي سينيئر اڳواڻ سبحان علي مگسي جي امڙ جي وفات تي پڻ دعا گهري ان موقعي تي هن ڳالهائيندي چيو ته اسين مگسي برادري جي ٻنهين خاندانن سان سندن ڏک ۾ برابر جا شريڪ آهيون
فاتحه خواني بعد ۾ ڊاڪٽر قادر مگسي ايس ٽي پي جي ضلعي اڳواڻ گل انقلابي پاران سندس مان ۾ رکيل چانھ پارٽي ۾ شرڪت ڪئي جتي هن ميڊيا سان ڳالهائيندي چيو ته ”سنڌ ۾ ڪامران ٽسوري جي بيان جي ڪا به اهميت ناهي، اجرڪ واري نمبر پليٽ سان سنڌ جي ثقافت اجاگر ٿيندي اسين سنڌي ثقافت جا محافظ آهيون هن وڌيڪ چيو ته هڪ پاسي سنڌ ۾ منشيات جي وڌندڙ وڪري ۽ واهپي سبب سنڌ جو نوجوان نسل ڪينسر ۽ ٻين موتمار بيمارين ۾ مبتلا ٿي چڪو آهي ته ٻئي پاسي بدامني سبب شهر ويران ۽ روڊن تي سناٽو ڇانيل آهي.
هن الزام لڳايو ته سنڌ حڪومت امن امان قائم ڪرائڻ ۾ مڪمل طور ناڪام ٿي چڪي آهي ۽ عوام شديد پريشانيءَ ۾ مبتلا آهي ان موقعي تي نثار احمد ڪيريو ، باغي رفيق ملاح ، منير احمد مگسي ، گل محمد مگسي ، سليم مگسي اظھر علي مگسي ۽ ٻيا پارٽي ورڪر پڻ موجود هئا
آگسٽ 10, 2025اي پيپر
