ڊاڪٽر قادر مگسي جو آصف زرداري تي سنڌ جو سودو ڪرڻ ۽ بلاول جي وزيراعظمي جي خواهشن تي تنقيد

سڪرنڊ( رپورٽ: راج ڪماراوڏ)ايس ٽي پي سربراهه ڊاڪٽر قادر مگسي سڪرنڊ ۾ ايس ٽي پي ضلعي نوابشاهه جي اڳواڻ گل انقلابي جي رهائشگاهه تي ميڊيا سان ڳالهائيندي چيو آهي ته صدر آصف زرداري ٻه چڪر صدر ٿيڻ لاءِ سنڌ جو سودو ڪيو آهي هاڻ سنڌ ۾ بچايو ڇا آهي جو ان جو سودو ڪري بلاول ڀٽو زرداري کي وزير اعظم ٺاهيندا. بلاول جي وزير اعظم ٿيڻ جا خواب ڏسڻ ڇڏي ڏين. اليڪشن صاف شفاف ٿيڻ گهرجي ملڪ اندر آئين کي بحال ڪيو وڃي. هاڻ سياسي تجربا بند ٿيڻ گهرجن.هن چيو ته مذهب ۽ سياست کي الڳ لڳ رکڻ گهرجي.

گورنر سنڌ ڪامران ٽسوري جي بيانن کي سنجيده نه وٺڻ گهرجي سندس بيان کل جوڳا هوندا. عدالتون يرغمال آهن ڪنهن به ماڻهو کي انصاف نه ٿو ملي. حڪومت چاهي ته 27 ترميم سميت ڪيتريون ئي ترميمون آڻي سگهي ٿي پر جيڪڏهن سنڌ جي ماڻهن جي مفاد نه هونديون ته انهن خلاف ڀرپور تحريڪ هلائي ويندي. آصف زرداري جي ڪرپشن ۽ اٽڪل بازي ۾ پي ايڇ ڊي ٿيل آهيسنڌ جا ماڻهو جڏهن لکن جي تعداد ۾ پنهنجي حقن لاءِ نڪرندا ته پوءِ رياست کي پريشاني ٿيندي.

جونيئر ذوالفقار ڀٽو شهيد مير مرتضيٰ جو پٽ آهي ۽ شهيد ذوالفقار ڀٽو جو پوٽو آهي اميد ته هو سنڌ جي ماڻهن جي ڀلائي لاءِ پنهنجو ڪردار ادا ڪندو اسان جون نيڪ تمنائون سندس سان گڏ آهن. منشيات جي زهر کي سنڌ جي هر گهٽي گهٽي ۾ عام ڪيو ويو آهي بجاراڻي ڳوٺ تي پوليس پاران ڪاهه ۽ لاشن جي بي حرمتي ڪري زبردستي دفنائڻ ڏکوئيندڙ عمل هو جنهن کي سنڌ جو ماڻهو ڪڏهن به وساري نه ٿو سگهي.

هن چيو ته شهيد بينظير ڀٽو جي شهادت بعد آصف زرداري ۽ بلاول سنڌ کي لٽيو ۽ ڦريو آهي سنڌو درياءَ جي پاڻي جو سودو ۽ معدني وسيلن جا سودا پڻ ڪيا اٿن. سنڌ جا ماڻهو ڪڏهن به کين معاف نه ڪندا. ان موقعي تي ايس ٽي پي وائيس چيئرمين نثار ڪيريو ،رفيق ملاح ،حاڪم انڙ ، ٻڍل مگسي ، محمود لغاري ، فتح ڳاهوٽي ، منير مگسي ، اختر مگسي ، گل محمد مگسي ،سليم مگسي ۽ ٻيا موجود هئا. جڏهن ته ڊاڪٽر قادر مگسي پاران آفتاب مگسي سان سندس چاچي جي وفات تي ۽ ايس ٽي پي اڳواڻ شعبان مگسي سان والده جي فوتگي تي تعزيت ڪئي.

آگسٽ 10, 2025