آزاد ڪشمير ۾ پوليس اهلڪارن جو احتجاج ٻئي ڏينهن به جاري، ڏهه نقاطي چارٽر آف ڊمانڊ پيش

مظفرآباد (ويب ڊيسڪ) آزاد ڪشمير جي مختلف ضلعن ۾ پوليس اهلڪارن جو احتجاج ٻئي ڏينهن به جاري آهي. ان دوران پوليس ٿاڻن ۽ ٻين اهم هنڌن تي ڊيوٽي جو بائيڪاٽ ڪيو ويو آهي ۽ پوليس اسٽيشنن ٻاهران بينر لڳايا ويا آهن.
گذريل ڏينهن سڄي ڪشمير ۾ پوليس ملازمن حڪومت آڏو ڏهه نقاطي چارٽر آف ڊمانڊ پيش ڪيو هو، جنهن کان پوءِ ڊي آءِ جي هيڊڪوارٽر ۽ ايس ايس پي احتجاج ڪندڙ ملازمن سان ڳالهين ڪيون.
ڳالهين جي نتيجي ۾ ڪوارٽر گارڊ ۾ بند پوليس اهلڪار ياسر کوکر کي آزاد ڪيو ويو ۽ سندس هڪ وڊيو به جاري ڪئي وئي، جنهن ۾ احتجاج ختم ڪرڻ جو اعلان ڪيو ويو هو.
پر اختيارين طرفان نوٽيفڪيشن جاري نه ٿيڻ جي صورت احتجاج ڪندڙ ملازمن جي نمائنده تنظيم جمعيت پوليس هڙتال ختم نه ڪرڻ جو اعلان ڪيو.
احتجاج ڪندڙن جو چوڻ آهي ته ياسر کوکر کان وڊيو بيان دٻاءَ هيٺ ورتو ويو، جمعيت پوليس ان بيان کي رد ڪري ٿي ۽ هڙتال جاري رهندي.
ملازمن جو چوڻ آهي ته مطالبن جي منظوري تائين هڙتال جاري رهندي، جڏهن ته اڄ وڌيڪ پوليس اهلڪار مظفرآباد پهچندا ته جيئن احتجاج ۾ حصو وٺن.
جمعيت پوليس طرفان جاري ڪيل ڏهه نقاطي چارٽر آف ڊمانڊ ۾ چيو ويو آهي ته ڊيوٽي دوران شهيد ٿيندڙ پوليس اهلڪارن جي پگهار فريز ڪئي ويندي آهي ۽ 60 سالن تائين ساڳي پگهار ڏني ويندي، جنهن ۾ تبديلي آڻڻ ضروري آهي.
ملازمن جو هڪ مطالبو آهي ته فڪس ڊيلي الائونس 2022ع جي ريوائز پيسڪل موجب ڏنو وڃي ۽ نارمل ۽ اسپيشل اسٽيشن جو نظام ختم ڪيو وڃي.
چارٽر ۾ هڪ ٻيو مطالبو آهي ته رسڪ الائونس 2008ع جي بيسڪ پي بدران 2022ع جي شرح سان ڏنو وڃي، ان کانسواءِ چارٽر آف ڊمانڊ ۾ پوليس اهلڪارن ۽ سندن گهرڀاتين کي پاڪستان ۽ ڪشمير جي وڏن اسپتالن ۾ آرمي طرز تي علاج جون سهولتون ڏيڻ جي به گهر ڪئي وئي آهي.
جمعيت پوليس جي ترجمان جو چوڻ آهي ته جيڪڏهن سندن مطالبن بابت نوٽيفڪيشن جاري ڪيو ويندو ته احتجاج ختم ٿي سگهي ٿو.
ٻئي پاسي آءِ جي پوليس ڪشمير رانا عبدالجبار پوليس دربار ۾ خطاب ڪندي چيو ته پوليس هڪ ڊسپلن فورس آهي ۽ جيڪي اهلڪار ڊسپلن جي ڀڃڪڙي ڪري رهيا آهن ، اهي پاڻ کي ڪمزور رهيا آهن.
هن وڌيڪ چيو ته هن بنا ڪنهن جي چوڻ جي حڪومت کي پوليس جي پگهارن ۾ واڌ لاءِ خط لکي ڇڏيو هو، جنهن تي اڳڀرائي به ٿي آهي، پر افسوس ان خط کي ڪجهه پوليس اهلڪارن چارٽر آف ڊمانڊ بڻائي احتجاج شروع ڪيو.