ڪي پي سينيٽ چونڊ: مراد سعيد سميت پي ٽي آءِ جا ڇهه اميدوار ڪامياب

پشاور (ويب ڊيسڪ) خيبر پختونخوا اسيمبلي ۾ سينيٽ چونڊن ۾ پاڪستان تحريڪ انصاف 6 ۽ اپوزيشن پارٽين 5 سيٽون کٽي ورتيون.
غير حتمي ۽ غير سرڪاري نتيجن موجب، سينيٽ جي 11 سيٽن تي ووٽنگ ٿي، جن ۾ سڀني 145 ميمبرن ووٽ ڪاسٽ ڪيا، 7 جنرل سيٽن مان 4 تي پي ٽي آءِ جي مراد سعيد، فيصل جاويد، مرزا آفريدي ۽ نورالحق قادري ڪاميابي ماڻي ، جڏهن ته اپوزيشن اتحاد کي 3 سيٽون مليون، جن ۾ ن ليگ جو نياز احمد، پيپلز پارٽي جو طلحه محمود ۽ جي يو آءِ جو عطاءُ الحق شامل آهن.
عورتن جي ٻن سيٽن تان پي ٽي آءِ جي روبينا ناز ۽ پيپلز پارٽي جي روبينا خالد سوڀاريون ٿيون، جڏهن ته ٽيڪنوڪريٽس سيٽن تي پي ٽي آءِ جي اعظم سواتي ۽ جي يو آءِ جي دلاور خان فاتح رهيا.
پي ٽي آءِ جي ناراض اميدوار خرم ذيشان کي ڪو به ووٽ نه مليو.
ياد رهي ته پي ٽي آءِ ۽ اپوزيشن وچ ۾ 6 ۽ 5 جي فارمولي تي اڳواٽ اتفاق ٿيو هو ۽ ساڳئي حساب سان نتيجا آيا.