بلوچستان ۾ ڪارنهن الزام هيٺ قتل ڪيل جوڙي جي شروعاتي پوسٽ مارٽم رپورٽ سامهون اچي وئي

ڪوئيٽا (ويب ڊيسڪ) بلوچستان جي سنجيدي ڊيگاري واري علائقي ۾ ڪارنهن الزام هيٺ قتل ڪيل جوڙي جي شروعاتي پوسٽ مارٽم رپورٽ سامهون اچي وئي آهي.
پوليس سرجن ڊاڪٽر عائشه فيض موجب، پوسٽ مارٽم ڊيگاري ڪول مائن قبرستان ۾ ڪيو ويو، عورت کي 7 ۽ مرد کي 9 گوليون لڳيون، ٻنهي کي 4 جون 2025 تي قتل ڪيو ويو هو.
ياد رهي ته سنجيدي ڊيگاري ۾ ڪارنهن الزام هيٺ قتل ڪيل جوڙي کي گوليون هڻي قتل ڪرڻ جو واقعو پيش آيو هو، جنهن جي وڊيو ڪجهه ڏينهن اڳ وائرل ٿيڻ کانپوءِ وڏي عوامي ردعمل سامهون آيو هو.
بلوچستان جي وڏي وزير سرفراز بگٽي واقعي جو نوٽيس ورتو ۽ چيو ته آپريشن جاري آهي ۽ سمورن ملوث جوابدارن کي قانون جي ڪٽهڙي ۾ آندو ويندو، رياست هميشه مظلوم سان گڏ آهي.