پنجاب سميت مُلڪ جي مٿانهين علائقن ۾ چوماسي برساتن جو چوٿون اسپيل سڀاڻي کان شروع ٿيندو

لاهور (ويب ڊيسڪ) پنجاب قدرتي آفتن کي منهن ڏيڻ لاءِ قائم اداري پي ڊي ايم اي جو چوڻ آهي ته 20 کان 25 جولاءِ دوران صوبي جي ڪيترن ضلعن ۾ مينهن ۽ آنڌاري جو امڪان آهي.
پي ڊي ايم اي ترجمان موجب، راولپنڊي، مري گليات، اٽڪ، چڪوال، منڊي بهاءُالدين، حافظ آباد، گجرات، جهلم ۽ گجرانوالا ۾ وسڪاري جي اڳڪٿي ڪئي وئي آهي.
پي ڊي ايم اي موجب لاهور، فيصل آباد، سيالڪوٽ، نارووال، ٽوبا ٽيڪ سنگهه، جھنگ، سرگوڌا ۽ ميانوالي ۾ به مينهن جو امڪان آهي.
ان کانسواءِ ڊيرا غازي خان، بهاولپور، بهاولنگر ۽ ملتان لاءِ برسات جي اڳڪٿي ڪئي وئي آهي.
پنجاب جي وزيراعليٰ جي هدايتن موجب سڄي صوبي جي انتظاميا کي الرٽ جاري ڪيو ويو آهي.
ڊِي جِي، پي ڊي ايم اِي عرفان علي ڪاٺيا موجب، چوماسي برساتن سبب پنجاب جي درياهن ۽ نالن ۾ پاڻي جي وهڪري ۾ واڌ جو خدشو آهي. سنڌو درياهه ۾ تربيلا ۽ ڪالا باغ وٽ هيٺين درجي جو ٻوڏ آهي.
جاري ڪيل بيان هن چيو ته سنڌو درياهه ۾ چشما واري هنڌ وچولي درجي جو ٻوڏ آهي، جتي پاڻي جي وهڪري ۾ واڌ ٿي رهي آهي، جڏهن ته اتي مٿاهين سطح جي ٻوڏ جو خدشو آهي، جنهن تحت انتظاميا کي الرٽ جاري ڪيو ويو آهي.
21 جولاءِ کان راوي، جهلم، ستلج ۽ چناب درياهن جي وهڪري ۾ واڌ بابت پري الرٽ جاري ڪيو ويو آهي.
ڊي جي پي ڊي ايم اي موجب، درياهن جي مٿاهين علائقن ۾چوماسي برساتن سبب پاڻي جي وهڪري ۾ غيرمعمولي واڌ جو انديشو آهي. شهرين کي اپيل آهي ته موسمي صورتحال تحت احتياطي تدبيرون اختيار ڪن.
بيان موجب، هن سال چوماسي سيزن دوران مختلف حادثن ۾ 123 ماڻهو فوت، 462 زخمي ۽ 150 عمارتن کي نقصان رسيو، فوتگيون آسماني وڄ ڪِرڻ، ڪرنٽ لڳڻ، وهنجندي ٻڏي وڃڻ ۽ زبون گهرن جي ڪِرڻ سبب ٿيون.
سندس وڌيڪ چوڻ هو ته پنجاب جي وزيراعليٰ مريم نواز جي هدايتن تحت آبادگارن جي فصلن جي نقصان جو به ازالو ڪيو ويندو، جڏهن ته متاثر فصلن جو نقصان جو ڪاٿو لڳايو پيو وڃي.