علي امين گنڊاپور جا ضمانت نه ٿيڻ جوڳا گرفتاري وارنٽ جاري

اسلام آباد (ويب ڊيسڪ) اسلام آباد جي عدالت خيبر پختونخوا جي وڏي وزير علي امين گنڊاپور جا ضمانت نه ٿيڻ جوڳا گرفتاري وارنٽ جاري ڪري ڇڏيا.
عدالت شراب ۽ هٿيار هٿ اچڻ واري ڪيس ۾ ڪي پي جي وڏي وزير جي حاضري کان ڇوٽ واري درخواست رد ڪندي علي امين گنڊاپور کي 342 جو بيان رڪارڊ ڪرائڻ لاءِ آخري موقعو ڏنو.
عدالت خبردار ڪيو ته علي امين گنڊاپور جي غيرحاضري تي 342 جي بيان جو حق به ختم ڪري سگهجي ٿو ۽ جيڪڏهن بيان رڪارڊ نه ڪرايو ته عدالت فيصلو به ٻڌائي سگهي ٿي.
حڪم نامي موجب، 21 جولاءِ کان اڳ علي امين گنڊاپور کي گرفتار ڪري عدالت ۾ پيش ڪيو وڃي، گرفتاري ۾ ڪا به ناڪامي برداشت نه ڪئي ويندي.
عدالت ڪيس جي وڌيڪ ٻڌڻي 21 جولاءِ تائين ملتوي ڪري ڇڏي.