خيبرپختونخوا سينيٽ چونڊون: پي ٽي آءِ ناراض اڳواڻن خلاف حڪومت ۽ اپوزيشن هڪ ٿي ويا

پشاور (ويب ڊيسڪ) خيبرپختونخوا ۾ سينيٽ چونڊن دوران پاڪستان تحريڪ انصاف (پي ٽي آءِ) جي قيادت ناراض اميدوارن طرفان نامزدگي ڪاغذ واپس نه وٺڻ تي مسلم ليگ (ن)، پ پ ۽ جي يو آءِ سان گڏجي اليڪشن وڙهڻ جو فيصلو ڪري ڇڏيو.
سينيٽ لاءِ پ پ اميدوار طلحه محمود ميڊيا سان ڳالهائيندي چيو ته حڪومت ۽ اپوزيشن جو طئي ٿيل معاهدو آهي ته جيڪڏهن پي ٽي آءِ جي ناراض اميدوارن آچر تائين هٿ نه کنيو ته سڀئي گڏجي چونڊون وڙهندا.
سندس چوڻ هو ته جنهن اجلاس ۾اِهو فيصلو ٿيو ته اجلاس ان ۾خيبرپختونخوا جي وڏي وزير سميت پي ٽي آءِ جا اڳواڻ ۽ اپوزيشن پارٽين جا نمائندا شريڪ ٿيا هئا.
طلحه محمود چيو ته معاهدي تحت حڪومت کي 6 ۽ اپوزيشن کي 5 سيٽون ملنديون ۽ پي ٽي آءِ ظابطن جي ڀڃڪڙي ڪندڙ ناراض اميدوارن خلاف ڪارروائي ڪندي.
ٻئي پاسي پي ٽي آءِ چيئرمين بئريسٽر گوهر جو چوڻ آهي ته سياسي ڪميٽي اهو فيصلو ڪيو آهي ته جيڪي اميدوار پي ٽي آءِ باني طرفان نامزد نه ٿيا آهن، اهي ترت نامزدگي ڪاغذ واپس وٺن ٻي صورت ۾ سندن خلاف ڪارروائي ڪئي ويندي.
هوڏانهن پي ٽي آءِ جي ناراض اڳواڻن واضح ڪيو آهي ته هو ڪنهن به صورت ۾ ڪاغذ واپس نه وٺندا.
هڪ بيان ۾ پي ٽي آءِ اڳواڻ خرم ذيشان چيو ته ڳالهه چونڊن کان گهڻو اڳتي نڪري وئي آهي، اصولن تان پٺتي هٽڻ ممڪن ناهي، سياست ۽ سيٽون کڏ جي تري ۾ پوَن ، اسان اصول تي قائم آهيون.