اهم پاڪستاني ڪرڪيٽر فٽنيس مسئلن جو شڪار، ايندڙ سيريز ۾ شرڪت شڪي

لاهور (ويب ڊيسڪ) قومي ڪرڪٽ ٽيم بنگلاديش جي دوري کان اڳ مسئلن جي ور چڙهي وئي آهي، جتي آل رائونڊر شاداب خان سميت ڪيترن ئي رانديگرن جي فٽنيس پريشاني جو سبب بڻجي وئي آهي.
ذريعن موجب، آل رائونڊر شاداب خان ساڄي ڪلهي جي تڪليف ۾ مبتلا آهي ۽ ڊاڪٽرن کيس سرجري ڪرائڻ جي صلاح ڏني آهي، جنهن کانپوءِ انگلينڊ ۾ شاداب خان جي سرجري جو امڪان آهي.
ذريعن جو چوڻ آهي ته سرجري کانپوءِ شاداب خان کي اٽڪل ٽن مهينن تائين ميدان کان پري رهڻو پوندو .
ذريعن موجب، شاداب خان کانسواءِ فاسٽ بالر نسيم شاهه ۽ محمد وسيم جونيئر به مڪمل طور فٽ نه آهن، جنهن سبب سندن ايندڙ سيريز لاءِ دستيابي شڪي آهي.
ذريعن جو چوڻ آهي ته بنگلاديش خلاف ٽي ٽوئنٽي سيريز لاءِ پاڪستان ٽيم ۾ امڪاني طور تي لاھور قلندرز سان واسطو رکندڙ فاسٽ بالر بالر سلمان مرزا ۽ ليفٽ آرم اسپنر سفيان مقيم کي شامل ڪيو ويندو.
واضح رهي ته بنگلاديش جي دوري لاءِ قومي ٽيم جو ٽريننگ ڪئمپ 8 جولاءِ کان نيشنل اسٽيڊيم ڪراچي ۾ لڳائي ويندي، جڏهن ته ٽيم 16 جولاءِ تي بنگلاديش روانو ٿيندي.
ٻنهي ٽيمن جي وچ ۾ 3 ٽي ٽوئنٽي ميچن تي ٻڌل سيريز 20 جولاءِ کان شروع ٿيندي.