سکر: انساني حقن بابت سيمينار، پٺتي پيل طبقن جي مسئلن تي تفصيلي بحث، ايس ايڇ آر سي طرفان قانوني مدد ۽ حقن جي تحفظ جو عزم

سکر ( رپورٽ: امداد گل ڪلوڙ) سنڌ انساني حقن ڪميشن (SHRC) جي طرفان چيئرپرسن اقبال احمد ڏيٿو ۽ جوڊيشل  ميمبر مير صفدر ٽالپر جي صدارت ۾ ضلعي جي انساني حقن جي چئلينجن جو جائزو وٺڻ ۽ بحث ڪرڻ لاءِ هڪ سيمينار منعقد ڪيو ويو.

 سيمينار ۾ 45 ڄڻن  شرڪت ڪئي، جن ۾ سول سوسائٽي جا ميمبر، مذهبي اقليتون، انساني حقن جا ڪارڪن، مختلف برادرين ۽ ميڊيا  جا نمائندا شامل هئا. سيمينار جي شرڪت ڪندڙن ضلعي جي پٺتي پيل ۽ ڪمزور طبقن کي درپيش سنگين مسئلن جي نشاندهي ڪئي.

ان  موقعي تي چيئرپرسن ايس ايڇ آر سي اقبال احمد ڏيٿو ڪميشن جي قانوني دائري ۽ آئيني ذميوارين جي اندر انهن مسئلن کي حل ڪرڻ جي عزم کي ورجايو. هن حقن جي تحفظ کي يقيني بڻائڻ لاءِ ايس ايڇ آر سي پاران کنيل قدمن تي روشني وڌي، جنهن ۾ اسپتالن ۽ اسڪولن جا باقاعده دورا، عوامي شڪايتن جي ازالي جو طريقو، عورتن ۽ ٻارن لاءِ پوليس اسٽيشن قائم ڪرڻ ۾ ڪردار، ۽ بزرگن لاءِ پناهه گاهه جي فراهمي شامل آهن. هن زور ڏنو ته اهي ڪوششون سکر ضلعي جي ماڻهن لاءِ واضح ۽ مثبت نتيجا ڏينديون. 

بحث دوران شرڪت ڪندڙن صنفي بنياد تي تشدد، ٻارن جي شادي، عورتن ۽ اقليتن سان امتياز، اسڪولن جي غير فعالي، ۽ اسپتالن ۾ دوائن جي کوٽ جهڙا مسئلا اٿاريا. ٻين خدشن ۾ پوليس سان زيادتي، غير قانوني حراست، ٻارن جي مزدوري، جبري مزدوري جا مسئلا، معياري تعليم ۽ صحت جي سهولتن تائين رسائي جي کوٽ، ماحولياتي تباهي، عورتن کي وراثت ۽ دستاويزي حقن کان انڪار، ۽ غير قانوني جرگہ سسٽم شامل هئا جيڪو رسمي انصاف جي نظام کي ڪمزور ڪري ٿو. سيمينار ۾ انهن چئلينجن کي منظم طور تي بيان ڪيو ويو،

جيڪي سماجي-ثقافتي روايتن، ادارتي ڪمزورين، ۽ قانوني نفاذ ۾ جڙيل آهن.  هن موقعي تي جوڊيشل   ميمبر  صفدر ٽالپور سيمينار ۾ برادري جي شرڪت جي حوصلا افزائي ڪئي ۽ ايس ايڇ آر سي پاران مسلسل سهڪار جو يقين ڏياريو. هن ڪميشن جي ڪردار جي تصديق ڪئي، جيڪو خلاف ورزين جي نگراني ڪرڻ، قانوني مدد فراهم ڪرڻ، ۽ قانوني طريقن سان جوابدهي کي يقيني بڻائڻ جي ڪوشش ڪري ٿو. سيمينار جو اختتام  مضبوط پيغام ۽ اجتماعي ڪوششن ذريعي هڪ منصفانه، جامع ۽ حقن تي ٻڌل سماج جي ڳڏيل ويزن سان ٿيو.

مَي 17, 2025