انٽرنيٽ بندش بابت بلاول جو بيان ۽ سنڌ جا بنيادي مسئلا

مجاهد چنا

چيئرمين پاڪستان پيپلز پارٽي بلاول ڀٽو زرداري ڪجھه ڏينهن اڳ سنڌ يونيورسٽي ڄامشورو ۾ رٿيل هڪ تقريب ۾ خطاب ڪندي چيو ته: انٽرنيٽ هاڻي هڪ بنيادي انساني حق آهي، ڊجيٽل بل آف رائٽس آڻينداسين، اسلام آباد ۾ ويٺل بابُوئن ۽ سياستدانن کي انٽرنيٽ سست ۽ وي پي اين بند ٿيڻ سان ڪو فرق ناهي پوندو، انٽرنيٽ سست ٿيڻ ۽ وي پي اين بند ٿيڻ سان اسان جي نوجوانن جو جيئڻ حرام ٿي ويندو آهي.

پ پ جي چيئرمين اهو پڻ چيو ته اڄ جي دنيا ۾ انٽرنيٽ بنيادي انساني حق آهي، تيز ۽ سستي انٽرنيٽ تائين پھچ جو حق اسان وٺنداسين، ڊجيٽل رائٽس بل لاءِ نوجوانن سان گڏ جدوجهد ڪنداسين. عوام جي حقن لاءِ بلاول جي بيچيني ۽ ويزن قابل قدر آهي پر انٽرنيٽ کي بنيادي حق قرار ڏيڻ ۽ ڊجيٽل رائٽس بل آڻڻ جي دعويٰ ڪندڙ بلاول ڀٽو زرداري کي اهو هرگز نه وسارڻ گهرجي ته انهن جي پارٽي سنڌ ۾ گذريل 16 سالن کان اقتدار ۾ آهي، پر اڄ جي جديد دور ۾ به سنڌ جا ماڻهو پاڻي، صحت، تعليم ۽ امن جھڙن بنيادي حقن کان محروم آهن.

جيتوڻيڪ سڄي سنڌ خاص طور تي اترسنڌ جا ضلعاڪشمور، گھوٽڪي، شڪارپور ۽ جيڪب آباد ۾ عملي طور تي ڌاڙيلن جو راڄ آهي، شهرين جي جان، مال، عزت ۽ آبرو محفوظ ناهي، هڪ رپورٽ مطابق سنڌ ۾ 50 سيڪڙو آبادي غربت جي ليڪو کان هيٺ زندگي گذاري رهي آهي جڏهن ته ڳوٺاڻن علائقن ۾ اها شرح 75.5 سيڪڙو تائين پهچي چڪي آهي. پيٽرول، گئس، ڪوئلي ۽ زرعي دولت سان مالا مال هوندي به، مخلص قيادت جي فقدان سبب سنڌ جو عوام مهانگائي، بک، بدحالي ۽ غربت واري زندگي گذارڻ تي مجبور آهن. صرف هڪ ضلعي ٿرپارڪر ۾ هن سال 450 ماڻهن پنهنجي زندگي ختم ڪري ڇڏي.

تعليمي ايمرجنسي باوجود، 70 لک کان وڌيڪ سنڌ جا ٻارڙا اسڪول کان ٻاهر آهن. اسڪولن ۾ پاڻي، ٽوائلٽ، ڀتيون ۽ ٻين بنيادي سهولتن کوٽ آهي، ڪجهه هنڌن تي اسڪولن جون عمارتون ڀوتارن جون اوطاقون ۽ گودام بڻيل آهن. سنڌ ۾ ماڻھن جو ڀنگ لاءِ اغوا هڪ منافع بخش ڪاروبار بڻجي چڪو آهي.

سنڌ ۾ بدامني جو اهڙو عالم آهي ته صرف هڪ ضلعي شڪارپور ۾ هن سال 115 ماڻهو قتل ۽ 70 ماڻهو اغوا ٿي چڪا آهن ۽ 4 هزار کان وڌيڪ ڏوھن جون وارداتون رپورٽ ٿي چڪيون آهن، جيڪي رپورٽ نه ٿيون اهي ان کان علاوه آهن. درجنين ماڻهو ھن وقت پڻ ڪچي جي ڌاڙيلن وٽ قيد آهن، پر حڪومت سڀ ڪجهه ٺيڪ هجڻ جي دعويٰ ڪندي نٿي ٿڪجي. جيڪا ھن جي ناڪامي ۽ بي حسي جو ثبوت آهي. بدترين بدامني جو شڪار ڪشمور ضلعي جو عوام ٻن مهينن کان احتجاج ڪري رهيو آهي. مجال آهي ته پيپلزپارٽي جي حڪومت ۽ ان جي چونڊيل نمائندن تي ڪو اثر پوي. سنڌ ۾ جھنگ جو قانون آهي ۽ اڄ جي جديد دور ۾ سنڌ جو عوام زندگي جي بنيادي ضرورتن ۽ حقن کان محروم آهن ۽ عملي طور تي پٿر جي دور ۾ رهڻ تي مجبور آهن.

سنڌ ۾ بدامني جو اهڙو عالم آهي جو ماڻهو ڏينهن جو محفوظ آهن نه رات ۾، ڌاڙيلن خلاف آپريشن ڪرڻ جا دعويٰ ڪرڻ باوجود عوام غير محفوظ آهي. ان ڪري بلاول ڀٽو انٽرنيٽ جو حق ڏيارڻ کان پهريان سنڌ ۾ ڌاڙيل راڄ ختم ڪرڻ ۽ پنهنجي صوبي جي  عوام کي عزت سان زندگيون گذارڻ جو حق ڏياري. سنڌ جي پاڻي تي ڌاڙو، ڪارونجھر جي ڪٽائي ۽ ڪچي جي ڌاڙيلن کي پيپلزپارٽي حڪومت جي سرپرستي حاصل هجڻ جي جا الزام آهن. عوام پاڻي جھڙي بنيادي سهولت کان محروم آهي ۽ ٽينڪر مافيا جي رحم و ڪرم تي ڇڏيل آهن. تباهه ٿيل روڊ رستا سبب صرف شهر  ڪراچي ۾ حادثن جا سڀ رڪارڊ ٽوڙي ڇڏيا آهن، هن سال 9 هزار ٽريفڪ حادثا ٿي چڪا آهن، جنھن ۾771 ماڻهو موت جي ور چڙهي ويا آهن، ڌاڙيلن جي مزاحمت ۾ 112 ماڻهو پنھنجي جان وڃائي چڪا آهن

پيپلزپارٽي جي قيادت ڪيستائين سنڌ جي عوام کي سبز باغ ڏيکاري بي وقوف بڻائيندي رهندي؟ عملي طور تي اهي حڪومت ۽ اپوزيشن ٻنهي جو مزو وٺي رهيا آهن. سندن  جي رٿابندي به اھا آهي ته ھاڻوڪن سان گڏوگڏ مستقبل ۾ ايندڙ به انهن جا “ماڻھو” هجن. بلاول جي پارٽي پڻ اها ئي راند ڪري رهي آهي، پاڻ کي حڪومت کان ٻاهر قرار ڏيئي، ناڪامين جو سمورو الزام  شهباز شريف تي، جڏهن ته صدر، چيئرمين سينيٽ، ٻن صوبن جي گورنري ۽ وزارت اعليٰ سميت حڪومت به انهن ئي وٽ آهي. جيئن آمريڪا ۽ يورپ دنيا ۾ انساني حقن جو واويلا ڪندا آهن، انسانيت جي تذليل ۽ بخيا اڊيڙڻ  ۾ به اهي ئي ملڪ اڳرا آهن، پري نه وڃو، غزه جي مثال وٺو. بلڪل اهڙي طرح انٽرنيٽ جو حق ڏيارڻ جي دعويٰ ڪندڙ بلاول ڀٽو جي پارٽي سنڌ ۾ سڀ کان وڌيڪ ماڻهن کي پنهنجن حقن کان محروم رکيو آهي، پر انهن جي ڪنن تي جُون به نٿي چري.

جنوري 3, 2025