سرڪاري آفيسرن ۽ ملازمن جو هڪ ئي وقت ٻٽي نوڪري ڪرڻ جو انڪشاف

ڪوئيٽا (ويب ڊيسڪ) بلوچستان جي مختلف ضلعن ۾ سرڪاري آفيسرن ۽ ملازمن طرفان هڪ ئي وقت هڪ کان وڌيڪ کاتن ۾ نوڪري ڪرڻ جو انڪشاف ٿيو آهي.
هڪ ئي وقت ٻٽي ملازمت جو انڪشاف صوبائي تعليم کاتي جي ملازمن بابت ٿيو آهي، ان سلسلي ۾ ڊائريڪٽر ايجوڪيشن پاران لاڳاپيل ملازمن جو نوٽيفڪيشن به جاري ڪيو ويو آهي، جنهن ۾ چيو ويو آهي ته 42 آفيسر ۽ ملازم تعليم کاتي سان گڏ ٻين کاتن ۾ پڻ نوڪري ڪري رهيا آهن.
نوٽيفڪيشن ۾ وڌيڪ چيو ويو آهي ته هڪ ئي وقت ٻٽي ملازمتن ڪندڙن ۾ ڪوئيٽا، تربت، بارکان، زوب، ڊيرا بگٽي، شيراني، ڪڇي، لسٻيلا، مستونگ، پنجگور، واشڪ، لورالائي، قلعي عبدالله، چمن ۽ پشين جي تعليم کاتي جا ملازم شامل آهن.
نوٽيفڪيشن ۾ مجاز اٿارٽي پاران ناڻي واري سيڪريٽري کي لاڳاپيل آفيسرن ۽ ملازمن خلاف ڪارروائي ڪرڻ جو حڪم ڏنو ويو آهي.
نوٽيفڪيشن ۾ چيو ويو آهي ته انهن آفيسرن ۽ ملازمن جون پگهارون روڪيون وڃن، جن جا نالا فهرست ۾ شامل آهن، انهن آفيسرن ۽ ملازمن خلاف بيڊا ايڪٽ 2011 تحت ڪارروائي ڪئي وڃي، ٻه هفتن اندر آفيسرن ۽ ملازمن خلاف ڪارروائي شروع ڪئي وڃي.
ان کانسواءِ ڊائريڪٽر ايجوڪيشن پاران سڀني لاڳاپيل ضلعن جي آفيسرن کي شوڪاز نوٽيس جاري ڪيو ويو آهي.