چيمپيئنز ون ڊي ڪپ ۾ ڪامران غلام جي ٻي سينچري، مارخورز هٿان ڊولفنز کي شڪست

فيصل آباد (ويب ڊيسڪ ) چيمپيئنز ون ڊي ڪپ ۾ محمد رضوان جي مارخورز مسلسل ٽِين ميچ ۾ڪاميابي ماڻي ورتي آهي.
اقبال اسٽيڊيم فيصل آباد ۾ کيڏيل ٽورنامينٽ جي ڇهين ميچ ۾ محمد رضوان جي مارخور سعود شڪيل جي ڊولفنز کي 92 رنسن تان شڪست ڏئي ڇڏي.
ڊولفنز ٽاس کٽي پهريان فيلڊنگ جو فيصلو ڪيو، مارخور مقرر اوورن ۾ نوَ وڪيٽن جي نقصان تي 284 رنسون ٺاهيون ۽ ڊولفنز کي کٽڻ لاءِ 285 رنسن جو هدف ڏنو.
مارخورز طرفان ڪامران غلام شاندار 113 ۽ ڪپتان محمد رضوان 51 رنسن جي اننگز کيڏي، ڊولفنز جي فهيم اشرف چار وڪيٽون ورتيون.
هدف پٺيان ڊوڙندي ڊولفنز جي پوري ٽيم 44 هين اور ۾ 192 رنسن تي ڍير ٿي وئي، ڊولفنز طرفان آصف علي ففٽي اسڪور ڪئي جڏهن ته ڪپتان سعود شڪيل 41 رنسون ٺاهي اڳڀرو رهيو.
مارخورز طرفان محمد عمران ۽ سلمان علي آغا 3،3 وڪٽيون حاصل ڪيون، شاندار سينچري اسڪور ڪرڻ تي ڪامران غلام کي پليئر آف دي ميچ قرار ڏنو ويو .
واضح رهي ته مارخورز جي اِها هلندڙ ٽورنامينٽ ۾ مسلسل ٽين فتح آهي جڏهن ته ڊولفنز کي پنهنجي ٻنهي ميچن ۾ شڪست جو منهن ڏسڻو پيو آهي.