سلمان خان جي هن گهڙي ۾ خاص ڇا آهي؟ حيران ڪندڙ تفصيل سامهون اچي ويا

دنيا جي مهانگي ترين گهڙين جي برانڊ جي مالڪ جيڪب ايريبو طرفان بالي ووڊ جي دبنگ سلمان خان کي گهڙي پارائڻ جي وڊيو سوشل ميڊيا تي وائرل ٿي رهي آهي.
جيڪب ايريبو دنيا جي مهانگي ترين گهڙين جي برانڊ جيڪب اينڊ ڪو جو مالڪ آهي، دنيا جي امير ترين شخصيتن مثال طور مارڪ زڪربرگ ۽ مڪيش امباڻي جهڙا ماڻهو به ان ئي برانڊ جون گهڙيون پائڻ پسند ڪندا آهن.
سلمان خان جي وائرل وڊيو جيڪب اريبو جي انسٽاگرام اڪائونٽ تان شيئر ڪئي وئي آهي جنهن ۾ کيس اداڪار کي پنهنجي برانڊ جي مهانگي ترين گهڙي” Billionaire III“ پارائيندي ڏسي سگهجي ٿو.
ان گهڙي ۾ چمڪندڙ سوين هيرن کي ڏسي ئي اندازو لڳائي سگهجي ٿو اِها گهڙي ڪيتري مهانگي هوندي.
وڊيو جي ڪيپشن ۾ جيڪب ايريبو لکيو ته هن ڪڏهن پنهنجي اِها گهڙي ڪنهن کي ٽراءِ ڪرڻ لاءِ ناهي ڏني پر سلمان خان لاءِ ائين ڪيو آهي.
جيڪب اينڊ ڪو جي بلينيئر III گهڙي دنيا جي مهانگي ترين گهڙين منجهان هڪ آهي جنهن جي قيمت ڀارتي ميڊيا موجب 41 ڪروڙ 98 لک ڀارتي رپيا ٻڌائي وئي آهي، پر سوال اِهو آهي ته بلينيئر III گهڙي ايتري مهانگي ڇو آهي ؟
ميڊيا رپورٽس موجب، بلينيئر III کي 152 قيراط جي زمرد جي انداز سان ڪٽيل هيرن مان تيار ڪيو ويو آهي جنهن ۾ 76 هيرا لڳل آهن، گهڙي جي ڊائل کي هڪ انوکي ڊيزائن سان گڏ تيار ڪيو ويو آهي اِها منفرد ڊيزائن گهڙي جي پيچيدا اندروني نظام کي واضح ڪري ٿي.
بلينيئر III جي بريسليٽ تي 504 هيري لڳل آهن، جڏهن ته مڪمل گهڙي 704 املهه هيرن مان تيار ڪئي وئي آهي.