عون چوڌري پارٽي سربراهه جو اهم پيغام کڻي دبئي روانو

لاهور (ويب ڊيسڪ) استحڪام پاڪستان پارٽي جو اڳواڻ عون چوڌري به دبئي روانو ٿي ويو.عون چوڌري دبئي ۾ پنهنجي جماعت جي سربراهه جهانگير ترين جو اهم پيغام نواز شريف ۽ آصف زرداري کي پهچائيندو.دبئي روانگي کان اڳ صحافين سان ڳالهائيندي عون چوڌري چيو ته پي ٽي آءِ چيئرمين ۽ اڳوڻو چيف جسٽس ثاقب نثار، جهانگير ترين خلاف ڪِريل سازش جا مک ڪردار هئا ۽ هڪ اهم شخصيت انهن جي ملوث هجڻ جي تصديق ڪئي.هن چيو ته جهانگير ترين کي قرباني جو ٻڪرو بڻائي پي ٽي آءِ چيئرمين پنهنجو رستو صاف ڪيو، جهانگير ترين جي ريويو پٽيشن سپريم ڪورٽ مان رد ڪرائڻ ۾ به عمران خان جو هٿ هو.واضح رهي ته دبئي اڄڪلهه پاڪستان جي سياست جو مرڪز بڻيل آهي، ن ليگ قائد نواز شريف ۽ پ پ جي اعليٰ قيادت دبئي ۾ موجود آهي.ن ليگ جي چيف آرگنائيزر مريم نواز سان اڳوڻي صدر آصف علي زرداري ۽ پ پ چيئرمين بلاول ڀٽو زرداري دبئي ۾ ملاقات ڪئي آهي.مريم نواز گذريل ڏينهن خاص گڏجاڻين ۾ پ پ قيادت کي اعتماد ۾ ورتو، پ پ ۽ ن ليگ قيادت وچ ۾ اڄ رات به ملاقات جو امڪان آهي.